Hukumar kula da kamfanoni ta Najeriya bata rijistar kasuwanci kyauta - kar ku bada lambar ku a yanar gizo

Hukumar kula da kamfanoni ta Najeriya (CAC) ce ke da alhakin rijistar kasuwanci a ƙasa. Yanzu tana yin hakan kyauta- wannan shine abun da ke ƙunshe cikin wata da’awa da ke yawo a Facebook a watan Nuwamba 2023. 

Wani saƙon kuma na cewa: “IDAN KUNA DA SHA’AWAR RIJISTAR CAC (HUKUMAR KULA DA KAMFANONI) TA FG. KU AJIYE LAMBAR KU TA WHATSAPP ANA TA AIKIN RIJISTA YANZU KUMA KYAUTA.” 

An haɗo da hoton allon waya wato sikirinshot na abun da yayi kama da takardar rijistar sunan kasuwanci. 

An saka saƙon a nan da nan. Wasu masu amfani da kafafen sada zumunta sun bada lambobin wayarsu a wajen yin tsokaci. 

Africa Check ta taɓa cin karo da makamanciyar da’awar cewa - gwamnatin tarayyar Najeriya ta amincewa hukumar ta yiwa kasuwanci da masu ayyukan kansu rijista kyauta - hakan ƙarya ce. 

Ko an samu wani sauyi? 

Hukumar ta ce, ayi watsi da saƙon

A ranar 7 ga watan Nuwamba, hukumar ta yi wannan gargaɗin ga ƴan Najeriya. 

“Dan Allah ku yi watsi da duk wani saƙon SMS ko WhatsApp da ke ce mu ku ku yi rijistar CAC kyauta, ba daga mu ya fito ba! Mun gode,” hukumar ta wallafa a shafin tiwita. 

Wasu rubuce-rubuce a kafafen sada zumunta da suke tambayar ku bayanan da suka shafe ku, suna sa ku cin karo da abubuwa da dama. Waɗanda suka haɗa da: 

• Waɗanda baku sani ba zasu samu damar tuntuɓar ku, har su ringa yi muku barazana.
• Kira daga masu damfara.
• Kai hari ta hanyar tura muku sakon sanin bayanan ku.
• Satar bayanan sanin ku.
• Hari ta fasahar zamantakewa, inda za’a iya yaudarar wasu ta amfani da lambar ku don samun bayanan ku.